منہاج القرآن انٹرنیشنل سپین کی مجلس شوریٰ کا اجلاس، رمضان المبارک میں افطاری و تراویح کے انتظامات کو حتمی شکل دی گئی
23جولائی بروز ہفتہ منہاج اسلامک سنٹر بارسلونا میں منہاج القرآن انٹرنیشنل سپین (بارسلونا)کی مجلس شوریٰ کااجلاس منعقد ہوا جس میں ممبران شوریٰ، ایگزیکٹو ممبران منہاج القرآن بارسلونا ، ایگزیکٹو ممبران منہاج القرآن بادالونا، کوارڈینیٹر اوسپتالیت، کوارڈینیٹر سانتا کولوما اور مختلف فورمز کے ایگزیکٹو ممبران نے شرکت کی ۔ یہ اجلاس صدر مجلس شوریٰ حاجی ارشد محمود کی صدارت میں منعقد ہوا ۔
اجلاس کا آغاز تلاوت قرآن کریم سے کیا گیا جس کی سعادت امیر منہاج القرآن بارسلونا علامہ عبد الرشید شریفی نے حاصل کی جبکہ منہاج یوتھ لیگ کے حافظ محمد عاطف احتشام نے نعت رسول مقبول ﷺ پیش کی۔ اجلاس میں نوید احمد اندلسی (سیکریٹری جنرل) نے ایجنڈا بتایا اور سالانہ کارکردگی رپورٹ پیش کی جس کو ممبران شوریٰ نے سراہا ، اجلاس میں شیخ الاسلام ڈاکٹر محمد طاہر القادری کی مرکزی مجلس شوریٰ کے اجلاس میں ہونے والی تربیتی گفتگو بھی پڑھ کر سنائی گئی ۔
اجلاس میں رمضان المبارک میں منہاج اسلامک سنٹر بارسلونا اور منہاج اسلامک سنٹر بادالونا میں افطاری اور تراویح کے انتظامات کے حوالے سے تفصیلی گفتگو کی گئی اور تمام امور کو حتمی شکل دی گئی ۔ اجلاس میں کوارڈینیٹر اوسپتالیت حاجی زاہد اختر زاہدی (ہور)نے بتایا گیا کہ بارسلونا کے قریبی شہر اوسپتالیت میں بھی اسلامک سنٹر (مسجد) بنانے کے لیے جگہ حاصل کر لی گئی ہے جس کے تعمیراتی کام کا آغاز جلد کر دیا جائے گا ۔اجلاس میں منہاج ویلفیئر فاؤنڈیشن کا لٹریچر بھی تقسیم کی گیا ہے اور آغوش کی تعمیر مکمل ہونے اور اس میں بچوں کی کفالت کے نظام کی تفصیل بتائی گئی ۔
منہاج القرآن انٹرنیشنل سپین نے بارسلونا، لوگرونیو اور بادالونا کے بعد اب اوسپتالیت میں بھی مسجد بنانے کے لیے جگہ حاصل کر لی ہے ، یہ جگہ 380مربع میٹر پر مشتمل ہے اور میٹرو لائن 5کے سٹاپ Collblancکے بالکل قریب واقع ہے ۔ منہاج القرآن انٹرنیشنل کے ممبران مجلس شوریٰ و ایگزیکٹو اور تمام فورمز کے عہدیداران نے محمد اقبال چوہدری (صدر منہاج مصالحتی کونسل سپین) اور حاجی زاہد اختر زاہدی (کوارڈینیٹر اوسپتالیت )کواس عظیم کارنامے پرمبارک باد پیش کی ۔
منہاج القرآن انٹرنیشنل سپین (بارسلونا) نے رمضان المبارک کے اوقاتِ کار (ٹائم ٹیبل)کا چارٹ جاری کر دیا ہے جو کہ 19جولائی سے منہاج اسلامک سنٹر بارسلونا، منہاج لائبریری بارسلونا اور منہاج اسلامک سنٹر بادالونا سے حاصل کیا جا سکے گا ۔ اس چارٹ (کیلنڈر) میں سحری و افطاری کے اوقات کے علاوہ نماز پنج گانہ کے اوقات بھی شامل کیے گئے ہیں ۔ عوام کی سہولت کے لیے مذکورہ چارٹ (کیلنڈر)منہاج القرآن سپین کی ویب سائٹ www.minhaj.es پر بھی اپلوڈ کیا گیا ہے جہاں سے اسے PDF یا JPGفارمیٹ میں ڈاؤنلوڈ کیا جا سکتا ہے ۔ 
بارسلونا، سپین کے نواحی شہر Hospitalet de Llobregatمیں سرکاری اعداد و شمار کے مطابق 3ہزار سے زائد پاکستانی آباد ہیں ، جن میں فیملیاں بھی شامل ہیں، جبکہ تاحال وہاں پر کوئی بھی ایسا مرکز قائم نہیں جس میں ان کے لیے دینی فرائض کی ادائیگی ، بچوں کی تربیت اور سماجی مسائل کا حل مہیا کیا جا رہا ہو، اس سلسلے میں منہاج اسلامک سنٹر بارسلونا میں 5جون بروز اتوار صدر MQIسپین مرزا محمد اکرم بیگ کی زیر صدارت ایک اہم اجلاس منعقد ہوا جس میں محمد اقبال چوہدری، علامہ خان محمد چشتی، چوہدری پرویز اختر، محمد نواز قادری، نوید احمد اندلسی، حاجی زاہد اختر کے علاوہ اوسپتالیت کی سماجی شخصیات نے بھی شرکت کی جن میں شبیر حسین گوہر، نیر اقبال، حاجی محمد ازرم، حاجی محمد منور شامل ہیں ۔
