26فروری بروز ہفتہ کو منہاج القرآن انٹرنیشنل سپین (بارسلونا) کے 15رکنی وفد نے دعوتی دورہ کے دوران طرطوسہ کی معروف سماجی شخصیت غلام دستگیر بٹ کو منہاج القرآن انٹرنیشنل سپین کا کوارڈینیٹر برائے طرطوسہ مقرر کرنے کا فیصلہ کیااس کا اعلان منہاج مصالحتی کونسل سپین کے صدر محمد اقبال چوہدری 26فروری کو الفتح مسجد طرطوسہ میں منعقدہ محفل میلاد النبی ﷺ میں کیا ، انہوں نے یہ بھی بتایا کہ آئندہ چند ماہ تک طرطوسہ میں منہاج القرآن انٹرنیشنل کی تنظیم کے قیام کا اعلان بھی کیا جائے گا جس کا بنیادی مقصد طرطوسہ کی پاکستانی کیمونٹی کو ایک ایسے مرکز کی فراہمی ہو گا جو دینی امور کے ساتھ ساتھ ان کے روز مرہ کے معاملات و مسائل کے حل اور ان کی نوجوان نسل کے بہترین مستقبل کی ضمانت ہو ۔اس موقع پر طرطوسہ کی سماجی و سیاسی شخصیات نے غلام دستگیر بٹ کو مبارک باد دی اور ان کے اپنے مکمل تعاون کا یقین دلایا ۔

26فروری بروز ہفتہ منہاج القرآن انٹرنیشنل سپین بارسلونا کے وفد نے طرطوسہ کا دعوتی دورہ کیا جس کے دوران طرطوسہ میں منعقد ہونے والی ایک محفل میلاد النبی ﷺ میں شرکت کی اور اہلیان طرطوسہ کو تحریک منہاج القرآن کا پیغام دیا ۔ وفد میں محمد نواز کیانی، علامہ عبد الرشیدشریفی، حاجی زاہد اختر، محمد اقبال چوہدری، نوید احمد اندلسی، حاجی ارشد محمود، محمد نواز قادری،احسن جاوید خان، خرم شبیر قادری، محمد عتیق قادری، محمد ذیشان قادری ، حافظ محمد جبران اور شاہین ملک شامل تھے ۔ طرطوسہ پہنچنے پر مسجد کمیٹی طرطوسہ کے چیئر مین غلام دستگیر بٹ اور ان کے رفقاء کی طرف سے وفد کا استقبال کیا گیا ۔ محفل کے بعد غلام دستگیر بٹ کی طرف سے وفد کے اعزاز میں شاندار عشائیہ دیا گیا اور 27فروری بروز اتوار کو معززین طرطوسہ کے ساتھ میٹنگ ہوئی جس میں محمد اقبال چوہدری اور نوید احمد اندلسی نے تحریک منہاج القرآن کے اغراض و مقاصد پر تفصیلی روشنی ڈالی اور شرکاء کے سوالات کے جوابات دیئے۔

محفل میلاد النبی ﷺ:

ہفتہ کو نماز عشاء کے بعد طرطوسہ مسجد کمیٹی کے زیر اہتمام مسجد الفتح میں سالانہ محفل میلاد النبی ﷺ منعقد ہوئی جس میں اہلیان طرطوسہ نے کثیر تعداد میں شرکت کی ، مسجد پہنچنے پر چیئر مین مسجد کمیٹی غلام دستگیر بٹ اور ان کے ساتھیوں نے منہاج القرآن کے وفد کا پھولوں سے استقبال کیا ۔ محفل کا باقاعدہ آغاز تلاوت قرآن کریم سے ہوا جس کی سعادت قاری محمد اعجاز نے حاصل کی، سلسلہ نعت خوانی میں منہاج یوتھ لیگ سپین کے حافظ محمد عاطف اور محمد عتیق کے علاوہ مقامی نعت خوانان نے حصہ لیا جن میں بابر حسین مدنی اور محمد عمر شامل ہیں ۔ مسجد کمیٹی کی دعوت پر بارسلونا سے تشریف لانے والے ڈاکٹر احسان محمد اور یونان سے تشریف لانے والے ڈاکٹر نثار قادری نے اور منہاج القرآن انٹرنیشنل سپین بارسلونا کے امیر علامہ عبد الرشید شریفی نے میلاد النبی ﷺ اور عشق رسول ﷺ کے موضوعات پر خطاب کیا ۔

پیغام تحریک منہاج القرآن :

طرطوسہ مسجد کمیٹی کے چیئر مین غلام دستگیر بٹ نے کامیاب محفل کے انعقاد پر کمیٹی اور اہل طرطوسہ کو مبارک باد دی اور منہاج القرآن انٹرنیشنل سپین کے جملہ مہمانوں کا شکریہ اداء کیا ۔ وفد میں شامل منہاج مصالحتی کونسل کے صدر محمد اقبال چوہدری نے اپنی گفتگو میں منہاج القرآن انٹرنیشنل کے اغراض و مقاصد اور سپین میں قیام کی مختصر تاریخ بیان کی اور کہا کہ جلد ہی طرطوسہ میں بھی منہاج القرآن کی تنظیم قائم کی جائے گی ، انہوں نے حاضرین محفل کی طرف سے منہاج القرآن کے حوالے سے مختلف سوالات کے جواب بھی دیے ۔ اس موقع پر محمد شکیل خان، امجد خان، ملک محمد اشرف اعوان، ملک سجاد سروراور قاری محمد اعجاز نے تحریک منہاج القرآن میں شامل ہونے کا اعلان کیا ،جبکہ غلام دستگیر بٹ ، سید اجمل شاہ اور بابر حسین مدنی پہلے ہی منہاج القرآن کی ممبر شپ حاصل کر چکے ہیں ۔ مشاورت کے بعد غلام دستگیر بٹ کو منہاج القرآن انٹرنیشنل سپین کے کوارڈینیٹر برائے طرطوسہ مقرر کرنے کا اعلان کیا گیا ۔

عشائیہ:

محفل کے بعد غلام دستگیر بٹ کی رہائش پر منہاج القرآن انٹرنیشنل سپین بارسلونا کے وفد کے اعزاز میں شاندار عشائیہ کا اہتمام کیا گیا جس میں ڈاکٹر احسان محمد بارسلونا)اور ڈاکٹر نثار قادری (یونان) نے بھی شرکت کی ، اس موقع پر نوید احمد اندلسی نے کمپیوٹر کے ذریعے شیخ الاسلام ڈاکٹر محمد طاہر القادری کی علمی خدمات اور زندگی کے مختلف شعبہ جات سے تعلق رکھنے والے افراد کے شیخ الاسلام کے بارے تبصروں پر مبنی مختلف ویڈیو کلپس دکھائے ۔

معززین طرطوسہ سے ملاقات :

27فروری بروز اتوار طرطوسہ مسجد کمیٹی کے دفتر میں ایک میٹنگ منعقد ہوئی جس میں طرطوسہ کی پاکستانی کیمونٹی کی اہم شخصیات نے شرکت کی جن میں چیئر مین مسجد کمیٹی غلام دستگیر بٹ، محمد اشرف اعوان، قاری اعجاز، سید اجمل شاہ، سلیم گورائیہ اور سید اکمل شاہ شامل ہیں ، میٹنگ میں منہاج القرآن انٹرنیشنل کی نمائندگی محمد نواز کیانی (سرپرست)، نوید احمد اندلسی(سیکریٹری جنرل )، محمد اقبال چوہدری(صدر مصالحتی کونسل) اور محمد نواز قادری(ناظم مالیات ) نے کی، جنہوں نے تحریک منہاج القرآن کے اغراض ومقاصد، شیخ الاسلام ڈاکٹر محمد طاہر القادری کی علمی خدمات، سپین میں منہاج القرآن کے قیام اور مختلف مراکز میں جاری علمی ،تدریسی، فلاہی سرگرمیوں پر تفصیلی بریفنگ دی اور مختلف سوالات کے جواب دیے ۔ محمد اقبال چوہدری نے بتایا کہ جلد ہی طرطوسہ میں منہاج القرآن انٹرنیشنل کی تنظیم کے قیام کا اعلان کیا جائے گا جس کا بنیادی مقصد مسلمان اور بالخصوص پاکستانی کیمونٹی کے لیے ایک ایسا مرکز قائم کرنا ہو گا جو ان کے لیے دینی فرائض کی ادائیگی کے علاوہ نوجوان نسل کے مستقبل کو محفوظ کرنے کا ذریعہ بن سکے اس مقصد کو حاصل کرنے کے لیے آپ سب کو تحریک منہاج القرآن میں شامل ہونے کی دعوت دی جاتی ہے ۔ اس میٹنگ کے بعد میزبان غلام دستگیر بٹ نے مصطفوی مشن کے وفد کوطرطوسہ ٹرین اسٹیشن پر الوداع کیا اور اس طرح منہاج القرآن انٹرنیشنل سپین کے وفد کا یہ تاریخی دورہ مکمل ہوا ۔

4فروری بروز جمعۃ منہاج اسلامک سنٹر بارسلونا میں ہنگامی اجلاس میں منہاج القرآن انٹرنیشنل سپین بارسلونا کے امیر علامہ عبد الرشید شریفی، قائم مقام صدر محمد ظل حسن قادری، نائب صدر حاجی زاہد اختر ، سیکریٹری جنرل نوید احمد اندلسی، صدر مصالحتی کونسل محمد اقبال چوہدری، صدر مجلس شوریٰ حاجی محمد ارشد اور صدر یوتھ لیگ احسن جاوید خان نے نظامت نشر و اشاعت سے گفتگو کرتے ہوئے وفاقی وزیر برائے اقلیتی امور شہباز بھٹی کے قتل کی شدید مذمت کی ہے اور اسے پاکستان کے خلاف سازش قرار دیا ہے ۔

اجلاس میں شامل عہدیداران نے کہا کہ یہ واقعہ پاکستان کو اندرونی طور پر کمزور کرنے اور بین الاقوامی طور پر ایک غیر محفوظ ریاست قرار دینے کی سازش ہے ، ایسے واقعات میں کوئی بھی مسلمان ملوث نہیں ہو سکتا کیونکہ اسلام دین امن و رحمت ہے ، انہوں نے حکومت پاکستان سے اس سفاکانہ قتل میں ملوث افراد کو فوری گرفتار کرنے کا مطالبہ کیا اور کہا کہ اسلامی قوانین کی روشنی میں غیر مسلموں کو بھی اسلامی ریاست میں مکمل حقوق حاصل ہیں ۔

5فروری بروز ہفتہ منہاج اسلامک سنٹربارسلونا میں منہاج القرآن انٹرنیشنل سپین (بارسلونا) کی مجلس شوریٰ کا اجلاس حاجی ارشد محمود کی زیر صدارت منعقد ہوا ،جس کا آغاز تلاوت قرآن کریم اور نعت رسول مقبول ﷺ سے ہوا جس کی سعادت بالترتیب حافظ محمد عابد اور محمد عتیق قادری نے حاصل کی اس کے بعد تنظیمی و تربیتی ہدایات پر مشتمل شیخ الاسلام ڈاکٹر محمد طاہر القادری کا خطاب دکھایا گیا ۔ 

اجلاس میں 20فروری کو ہونے والی 15ویں سالانہ میلاد النبی ﷺ کانفرنس کے انتظامات کو حتمی شکل دی گئی ، اس کے علاوہ اجلاس میں منہاج القرآن سپین کے زیر اہتمام ہونے والی دیگر محافل (بادالونا، اوسپیتالیت، طرطوسہ، لوگرونیو)کے بارے میں بھی گفت و شنید کی گئی ، اجلاس میں صدر MQIسپین مرزا محمد اکرم بیگ اور سیکریٹری جنرل نوید احمد اندلسی نے ایگزیکٹو کی گزشتہ 3ماہ کی کاردگی رپورٹ بھی پیش کی جس کو اراکین شوریٰ نے سراہا۔ صدر مجلس شوریٰ حاجی ارشد محمود نے تمام اراکین شوریٰ اور ممبران ایگزیکٹو کو شوریٰ کے کامیاب اجلاس اور میلاد النبی ﷺ کانفرنس کے انتظامات پر مبارک باد پیش کی ۔ اجلاس کا اختتام علامہ عبد الرشید شریفی (امیر تحریک) نے خصوصی دعا سے کیا ۔

3 فروری بروز جمعرات بعد از نماز مغرب منہاج اسلامک سنٹر بارسلونا میں ماہ ربیع الاول کے آغاز پر خصوصی محفل کا انعقاد کیا گیا۔

آقائے دوجہاں ﷺکی ولادت کے بابرکت مہینہ کے استقبال کے سلسلے میں منعقدہ اس محفل کا باقاعدہ آغاز حافظ محمد عابد نقشبندی نے تلاوت قرآن کریم کیا جس کے بعد عشاقان رسول نے آقا دوجہاںﷺ کی بارگاہ میں گلہائے عقیدت پیش کیے۔ان خوش نصیب حضرات میں حافظ محمد عاطف احتشام ، محمدآصف قادری، عبد الواحد چشتی اور منہاج اسلامک سنٹر کے طلباء شامل ہیں۔

بعد ازاں علامہ محمد عابد نقشبندی نے خطاب فرمایا اور ماہ ربیع الاول کی فضیلت بیان کی، اپنے خطاب میں انہوں نے کہا کہ اس مبارک ماہ کے دوران پر ہمیں بے حد خوشی منانی چاہیے کیونکہ یہ سنت الہیہ ہے اور تاجدار کائنات ﷺ نے خود اس کی خوشی کو منانے کا حکم فرمایا۔ انہوں نے مزید کہا اس ماہ کے دوران ہمیں انفرادی اور اجتما عی طور پر اللہ کے حبیب ﷺ کی ولادت با سعادت کی خوشی میں محافل کا انعقاد کرنا چاہیے۔آخر میں تمام شرکا ئ محفل کے لیے مٹھائی کا انتظام کیا گیا۔