5ستمبر بروز اتوار (بمطابق 26رمضان المبارک) نماز عشاء و تراویح کے بعد منہاج اسلامک سنٹر بارسلونا (سپین) میں ایک عظیم الشان روحانی و وجدانی محفل منعقد کی گئی جس میں سینکڑوں فرزندان اسلام نے شرکت کی ۔ محفل ساری رات جاری رہی جس میں محفل نعت، انفرادی عبادات، نماز تسبیح ، خطاب اور خصوصی دعا کی گئی ۔
محفل کے پہلے حصے میں نماز تراویح کی ادائیگی کے بعد ختم قرآن کریم کے سلسلے میں خیر و برکت ، وطن عزیز پاکستان سے آفات کے خاتمے اور دین مبین کی سربلندی کے لیے خصوصی دعا کی گئی جس کے اختتام پر تبرک تقسیم کیا گیا ۔اس موقع پر صدر منہاج مصالحتی کونسل سپین محمد اقبال چوہدری نے حافظ محمد عابد نقشبندی (امام)اور حافظ محمد مسعود نقشبندی (سامع) منہاج القرآن انٹرنیشنل سپین کی طرف سے خصوصی مبارک باد دی اور دوران رمضان ان کی محنت کی تعریف کی ۔
محفل کے دوسرے حصے کاباقاعدہ آغاز تلاوت قرآن کریم سے حافظ محمد عاطف احتشام نے کیا ، نعت خوانان مصطفی ﷺ نے بارگاہ رسالت مآب میں عقیدت کے پھول نچھاور کیے ان خوش بختوں میں الحاج قاری عبد الرحمان ، حافظ محمد ناصر، حافظ محمد عاطف اور دیگر شامل تھے ۔ منہاج اسلامک سنٹر بارسلونا کے 16معتکفین اور رمضان کے دوران منہاج اسلامک سنٹر بارسلونا میں مختلف امور میں خدمات سر انجام دینے پر حاجی نذیر اداسی، حاجی لیاقت علی، چوہدری مقصودحسین اور قمر عباس کو منہاج القرآن بارسلونا کی طرف سے تحائف پیش کیے گئے جس کے بعد حافظ محمد عابد نقشبندی کو دعوت خطاب دی گئی انہوں نے اپنی تقریر میں کلام باری تعالیٰ اور احادیث نبوی ﷺ کی روشنی میں لیلۃ القدر کی اہمیت و فضیلت بیان کی ۔
خطاب کے اختتام پر باجماعت نماز تسبیح اداء کی گئی جس کے بعد حافظ محمد عابد نقشبندی نے رقت آمیز دعا کروائی جس دوران شرکاء نے دھاڑیں مار مار کر رب ذو الجلال سے اپنے گناہوں کی معافی طلب کی اور وطن عزیز کی سلامتی و خاتمہ آفات کے لیے دعا مانگی۔ انفرادی عبادات کے بعد تمام حاضرین کے لیے سحری کا انتظام موجود تھا۔ محفل میں انتظام و انصرام کی ذمہ داری منہاج یوتھ لیگ سپین کے نوجوانوں نے احسن طریقے سے سر انجام دی ۔ نماز فجر کی ادائیگی پر محفل اختتام پذیر ہوئی ۔اس عظیم الشان محفل میں نقابت کے فرائض محمد اقبال چوہدری اور نوید احمد اندلسی نے سر انجام دیے ۔
یاد رہے کہ منہاج القرآن بارسلونا کے زیر انتظام بارسلونا میں گزشتہ 14سال سے باقاعدگی سے شب میلاد مصطفی ﷺ، شب معراج مصطفی ﷺ، شب برات اور شب قدر کے موقع پر شب بیداری کا اہتمام کیا جاتا ہے ۔
ç
